An alda gonot baian de droga, alcolisà, porsones zënza tët che vir da sores. Ince iö à arjunt na certa eté y sun la möta de öna de chëstes porsones. Mi pere ê na persona da n gran cör, cun na gran inteligënza. Por gauja de problems y de stritaries cun mia uma, àl tut la dezijiun da sen jí da ciasa y da se destachè dala familia. Insciö àl metü man so pice calvare; al à metü man da se lascè jí, da bëre y insciö al spo ince pordü le laûr. Zënza avëi en post ola jí a dormí le incuntan tres plü gonot por strada, cioch! Ci essi pa ince podü fa inlaôta? I ne à nia dadî cumplí i 10 agn canche al me ê gnü a orëdla che mi pere ê tl paîsc vijin che al s´inciocâ y petlâ. I me doda dassënn.

I ê ciamó picera y mi pere me mancia dër. I aldi tres plü gonot cuntan dala jënt che ai l’udô jan dai patri de convënt a petlé do la jopa. Leghermes de soferënza me rogoro jö por les massëdles, i me sintî sora e lasciada sön na pert. En dé l´ài incuntè sön strada, al ê cioch. Trami ùn metü man da pité, i sintîn n gran öt te nos. Al n´ê degügn che ti dê na man. Iö sun chersciüda sö zënza d´ël, i m’à fat strada laoran te n gröm de posc. Sce i savô olache al ê, ciarâi da ti fà avëi les cosses che al adorâ le plü. Por tröc agn él jü inant por chësc tru, n tru plëgn de soferënza por ël y por me. Ti ultims mëisc de süa vita sunsi stada buna da ti stè dlungia en pü´ deplü; i ciarâ da jí a le ciafè plü gonot che ara jê, y stê dî a tigni süa man tles mies. Chësc ti fajô bun a ël y a me. Al é spo mort te mi brac. I m´la imaginé gonot te paraisc, le purgatore àl bele passé sön la tera. Mo süa maiú soferënza ê zënz´ater le comportamënt de sü parënc te sü confrunc. Al ess albü tan debojëgn de amur y comprenjiun, che ne ciafâl nia da chisc. Porsones sciöche mi pere mirita dignité, sce i ti la dun, i odarunse pitan dala ligrëza.
P. V.
Vëndres, 13.05.2011 08:28